Симеон Полоцкий. Псалтирь рифмотворная. Москва, 1680

Симеон Полоцкий. Рифмотворная Псалтырь«Рифмотворный» перевод «Псалтири царя и пророка Давида» был выполнен в необычайно краткие сроки — с 4 февраля по 28 марта 1678 г. и напечатан отдельной книжкой в Верхней типографии в 1680 г.
Эта рифмотворная Псалтирь представляет собой, как и псалтирь Яна Кохановского, почти дословный стихотворный «метафрасис» традиционной славянской Псалтири, исполненный с целью «дать в руки читателя понятный, приспособленный для чтения, услаждающего слух, и для пения в домашней
обстановке текст». В 1680 г. эта Псалтирь была положена на ноты выдающимся русским композитором — певчим дьяком В.П. Титовым (было составлено 165 музыкальных композиций). По свидетельству М.В. Ломоносова, Псалтирь Симеона Полоцкого была именно той книгой, по которой он впервые познакомился с российским стихотворством.

© Сидорович Л.Н., 2009.

Полностью Псалтирь рифмотворная Симеона Полоцкого находится в свободном доступе на сайте АВВА.ru: Псалтирь царя Давида, художеством рифмотворным равномерно слога и огласноконечно, по различным стихом  родом преложенная (поэтические тексты псалмов Симеона Полоцкого из ранней нотной рукописи РНБ. ОР. Сол. 692/800).

Сидорович Л.Н., подготовка текста к публикации, 2009.

Псаломъ 1
Псаломъ 4
Псаломъ 5
Псаломъ 8
Псаломъ 12
Псаломъ 27
Псаломъ 28
Псаломъ 34
Псаломъ 41
Псаломъ 45
Псаломъ 60
Псаломъ 63
Псаломъ 73
Псаломъ 81
Псаломъ 84
Псаломъ 89
Псаломъ 100
Псаломъ 102

ПСАЛОМЪ 1

Блаженъ муж, иже во злых совѣтъ не вхождаше,
    ниже на пути грѣшных человѣк стояше,
Ниже на сѣдалищех восхоте сѣдѣти
    тех, иже не желаютъ блага разумѣти,
Но в законъ господни волю полагаетъ,
    тому днемъ и нощию себѣ поучаетъ.
Будетъ бо яко древо при водах саждѣнно,
    еже дастъ во время си плод свой неизмѣнно.
Листъ его не отпадетъ и все еже дѣетъ,
    по желанию сердца онаго успѣетъ.
Не тако нечестивый, ибо исчезаетъ
    яко прах, его же вѣтръ съ земли развѣваетъ.
Тѣмъ же нечестивии не имутъ востати
    на суд, ниже грѣшницы в совѣтъ правых стати,
Вѣсть бо господь путь правы, тыя защищаетъ,
    Путь паки нечестивых в конецъ погубляетъ.

ПСАЛОМЪ 4

Внегда возвах тя, боже живый на небѣси,
    свидетѣлю правды ми, услышалъ мя еси
    и распространилъ в скорби и впредь да щедриши,
    гласъ молитвы моея теплые услыши.
Вы, сынове людстии, доколе живѣте,
    в тяжкосердии тщетных и ложных ищете.
    Ведите, яко господь щедрый удивилъ есть
    преподобна раба си и чюднѣ хранилъ есть.
Внегда воззову к нему, изволить ми вняти
    отъ всех навѣтов вашихъ и впредь защищати.
    Гнѣвайтеся во сердцѣх, а не согрѣшайте,
    яже в нихь глаголѣте, на ложех смывайте.
Пожрите жертву правды, в бозе уповайте,
    оставите лукавство, правду содѣвайте,
    Глаголють нецыи: кто явить намь благая,
    аще будемъ творити дѣлеса правая –
Се знаменася на насъ свѣтъ лица ти, боже,
    иже дѣлесъ истинны мзду знати поможе.
    Даль еси вѣселие до сердца моего
    отъ плодъ пшеницы, вина, елеа своего.
Умножение взяша, азъ же имамъ спати
    во мирѣ купно съ ними и здраво востати;
    яко бы мя в надежду, боже, вселилъ еси,
    егда о стяжании царства явилъ еси.

ПСАЛОМЪ 5

Глаголы моя изволи внушити,
Ко званию мя ушы приклонити,
Вонми молбъ гласу, царю и боже мой,
        аз бо есмь рабъ твой.
Яко азъ к тебѣ имамъ ся молити,
Господи, утро изволи внушити,
Утро предстану тебѣ, ты узриши,
        милость явиши.
Беззакония нѣси богъ хотящий
Ты, не близ тебѣ будетъ зло творящий,
Ни лукавнуяй тебѣ присѣлится,
        злый удалиться.
Ты беззаконных муж ненавидиши,
Глаголющие лжу вся погубиши;
Мужа лсти, крове господь ся гнушаетъ,
        скоро отмщаетъ.
Аз же, на милость многу уповая,
Вниду во домъ твой, поклонъ сотворяя
К храму святому твоему, бояся,
        сердцемъ страшася.
Правдою ти мя, господи, настави,
Врагъ моихъ ради путь мой вѣсь исправи,
Яко отъ устъ ихъ что право – отметно,
        сердце суетно.
Гортань ихъ гробу точна отверзенну,
Гноемъ смѣрдящымъ съ костми исполнѣнну,
Языки лщаху. Тщися имъ судити,
        боже, и мстити.
Да отъ мыслей си отпадутъ конечно,
По нечестию ихъ рини я вѣчно,
Господи, яко прогнѣваша тебе
        врази на себе.
Да веселятся, иже уповаютъ
На тя, и вѣчну радость получаютъ,
А ты, господи, самъ ся в нихъ вселиши,
        милость явиши.
И похвалятся вѣсело о тебѣ,
Иже имя ти чтимое на небѣ, любятъ,
праваго ты благословиши,
        ибо любиши.
Ты самъ, господи, щитомъ ти небѣснымъ,
Благоизволомъ твоимъ о насъ деснымъ,
Изволилъ еси торжество намъ дати,
        главы вѣнчати.

ПСАЛОМЪ 8

Господи боже, коль чюдно есть твое
По всей вселеннѣй имя пресвятое,
Ибо лепота твоя вознесеся
        выше небесе.
Из устъ младѣнец, еще сосца ссущих,
Свершилъ ты хвалу ради врагов сущих,
Да местника зла скоро разрушиши,
        врага смириши.
Яко небѣса имамъ созерцати,
Яже изволи рука ти создати,
Луну и звезды, и вся, яже еси
        создалъ в небѣси?
Что человѣк есть, яко ты помниши,
Ли человѣчь сын, яко и любиши?
Благоволили его посещати,
        милость являти.
Мало отъ аггелъ онъ есть умаленный,
Славы и чести вѣнцемъ украшенный;
Над дѣлы рук ти ты его постави,
        зѣло прослави.
Покорилъ еси под нозѣ онаго
Овцы вся, волы и скота всякаго,
Птицы и рыбы, все еже летаетъ
        и что плаваетъ.
Господи, господь наш! коль чюдно твое
По всей вселеннѣй имя прѣсвятое!
Весь сонмъ небѣсных оно прославляетъ,
        песнь воспѣваетъ.

ПСАЛОМЪ 12

Доколѣ мя, господи, в конецъ забудеши?
    Доколѣ отвращати лице ти будеши?
Доколѣ печаль душу будетъ ми снѣдати
    И болѣзнь сердцу во дни и в нощи стужати?

Доколѣ врагъ мой лютый на мя вознесется?
    Призри на мя, боже мой, да рабъ твой спасется.
Просвѣти очи моя свѣтомъ божествѣнным,
    Да некогда усну в смерти сномъ невозбужденнымъ.

Да не речетъ врагъ о мне: азъ нань укрѣпился.
    Аз бо помощи твоей, боже мой, вручихся.
Аще ся азъ подвижу – то возвѣселятся,
    Иже выну стужати души моей тщатся.

Аз же на милость твою всегда уповаю,
    О спасении твоемъ веселия чаю;
Благо ми творшу богу имамъ воспѣвати,
    Имя бога вышняго вѣчно прославляти.

ПСАЛОМЪ 27 (audio)

Господи, к тебѣ слезно воззываю,
Даждь святый отвѣтъ, того ожидаю;
Аще ты, боже, гласъ свой удержиши,
        в гробъ мя вселиши.
Услыши гласъ мой, егда ти молюся
И руцѣ мои воздѣвати тщуся
К церкви святѣй ти, боже мой, и к тебѣ,
        живущу в небѣ.
С грѣшники мене да не вомѣниши,
С творцы неправды да не погубиши,
И съ теми, иже мир усты вѣщаютъ,
        сердцы прелщаютъ.
Мзду имъ по дѣломъ ихъ да сотвориши
И по лукавству мыслей ихъ отмстиши,
Да по заслугамъ приимутъ отъ тебѣ
        казни на себе,
Яко дѣлъ твоихъ не хотѣша знати,
Что мя хощеши ты самъ возвышати,
Тѣмъ же тобою будутъ разорени,
        ни воздвижени.
Благословенъ богъ, молитвы внушивый,
Мой пособитѣль, мене защитивый,
Нань сердцѣ мое силно уповаше,
        онъ помощь даше.
Тѣмъ же моя плоть весела явися,
Волею сердца пѣти устроися
Господню славу; онъ же утверждаетъ,
        люди спасаетъ.
Христа своего господь защититѣль,
Буди людемъ ти, боже, самъ спаситель,
Въ достоянии паси человѣки
        сам во вся вѣки.

 ПСАЛОМЪ 28

Сынове бога жива, господу несите
    яко сыны овния, хвалу воздадите.
Имени его славу несите премногу,
    поклонитеся, в дворѣ святѣмъ его, богу.
Гласъ господень на водах прѣстрашенъ явися,
    богъ славы возгремелъ есть, кто не устрашися?
Господь на водах многихъ волны возбудилъ есть,
    когда в нихъ фараона съ вои погрузилъ есть.
Гласъ господѣнь в крѣпости егда низхождаше,
    гласъ во велелѣпотѣ, егда законъ даше.
Гласъ господень велия кедры сокрушаете,
    и ливанские кедры господь сотираетъ.
Сильныя яко тѣлцы на ливанѣ можетъ
    истнити, а противу кто стати возможет?
А иже бысть милости его возлюбленный,
    сыну единорога есть уподобленный.
Гласъ господень пламени огня прѣсецаетъ,
    всегустые пустыни силно сотрясаетъ.
И пустыня каддийска онемъ сотрясеся,
    никто противный ему никогда спасеся.
Гласъ господѣнь елени к роду совершаетъ
    и темныя дубравы свѣтло открываетъ.
В церкви его всякъ славу долженъ глаголати,
    господь потоп на земли силенъ населяти.
Господь сѣдитъ яко царь преславно во веки,
    аггелы обладая, купно человѣки.
Господь крѣпость людемъ си имать даровати
    и благословѣние съ миромъ имъ подати.

ПСАЛОМЪ 34

Суди, господи, мя обидящие,
Возбрани, боже, мене борющие,
            невинна суща.
Возми мечь и щитъ, стани в помощь мою,
Вземъ оружие, яви милость твою –
            запни гонящихъ.
Рцы души моей: “Аз есмь твой спаситель”,
Сотвори, да всякъ оныя гонитѣль
            посрамленъ будетъ.
Злаго ми любцы вспять да возвратятся,
Яко пред вѣтромъ прах да расточатся
            в разныя страны.
Аггелъ господѣнь ихъ да оскорбляетъ,
Аггелъ господѣнь ихъ да погоняетъ
            в тмѣ путемъ ползкимъ.
Яко ми сѣти пагубы сокрыша
И души моей всуе поносиша
            зѣло досадно.
Ея же не вѣсть, в сѣть врагъ да впадется,
В ловитву, юже сокры, да вплетется
            за свою прелесть.
Душа же моя да возвеселится
О бозе спасѣ, яко свободится
            отъ сети ловчи.
Вся моя кости рекуте: Живый в небѣ
Боже! Кто и гдѣ есть подобенъ тебѣ
            в милосердии?
Ты нища из рук крѣплшихъ избавляяй,
Отъ хищных врагов мене свобождаяй,
            самъ единъ еси.
Лжесвидетѣли на мя клевѣтаху,
Их же не вѣдѣх, мене вопрошаху,
            да мя погубятъ.
За мою благость воздаша ми злая,
Душу загнаша в мѣста неплодная,
            да гладомъ таю,
А внегда они стужаху ми зѣло, 
Смирях дух постомъ, а вретищемъ тѣло,
            да господь призритъ.
Молитва моя в нѣдра ми вратися,
Господь всещедрый милостив явися
            за смирѣние,
Яко ближнему тщахся угождати,
Яко о братнихъ случаех рыдати,
            тако смиряхся.
Они же на мя собор сотвориша,
Со вѣселиемъ раны ми мыслиша, –
            азъ аки не чух.
Отъ любве должны вси раздѣлишася,
Онѣй же злобѣ не умилишася,
            братия суще.
Подражнѣниемъ лютѣ мя дражниша,
Искусиша мя и скрежетъ твориша
            зубы своими.
О господи мой! Когда то узриши
И душу мою благоустроиши
            отъ ихъ злодѣйства?
Иже яко льви гладнии рыкаютъ,
Единородну мою умышляютъ
            зубы терзати.
Аз в церкви мнозѣ тя исповѣдати
Имамъ и в людех тяжцѣх восхваляти
            за милость твою.
Врагомъ без правды ненависть имущымъ
На мя, очима си помизающымъ
            не даждь радости.
Яко мнѣ убо мирно глаголаху,
А в сердцах лести на гнѣвъ помышляху,
            да мя погубятъ.
Уста си на мя лютѣ разширяху:
“Благо же, благо, видяте, – глаголаху, –
            очеса наша”.
Ты, сия видѣвъ, да не премолчиши,
Боже, отъ мене да не отступиши,
            во скорби суща.
Встани, боже, сотвори судъ правый!
Господи, зри прю, даждь судъ, да лукавый
            не вѣселится.
Да в сердцѣх своихъ о мнѣ не вѣщают:
“Благо намъ, благо!”, ни да обещают:
            “Уже пожремъ и”.
Срамъ да обыметъ и да постыдятся
Вси врази вкупе, иже вѣселятся
            о злых ми сущих.
В студъ и срамоту да суть облечени,
Иже великимъ хуламъ изучени
            мнѣ глаголати.
Иже по моей правдѣ побораюте,
Веселие и радость да познают
            во сердцѣх своих.
Иже ми мира желаютъ отъ бога,
Выну да поюте: “Буди слава многа
            господу богу!”
Аз же языкомъ правду ти хвалити
Моимъ и славу имамъ возносити
            в мирѣ на всякъ день.

ПСАЛОМЪ 41 (audio)

Якоже елень, ловцы утруждѣнный,
Воды желаетъ быти прохлаждѣнный,
Тако азъ, боже, к тебѣ воздыхаю,
            зрѣти желаю.

Возжажда душа моя ко живому
Богу святому и богу крѣпкому,
Когда прииду к нему и явлюся,
            возвѣселюся.

Слезы ми в мѣсто хлеба тогда быша,
Егда дѣнь и нощь врази мя просиша:
“Где богъ твой? Аще тебѣ не остави,
            того намъ яви”.

Сия помянухъ, таже вѣселихся,
Яко в домъ божий ити извѣстихся,
До крова дивна, в гласъ свѣтла лика
            шума велика.

О душе моя! Вскую ты скорбиши,
Мя смущаеши? На бога да зриши,
Того исповемъ, онъ ми богъ, спаситель
            и покровитель.

Во мнѣ смятеся зѣло душа моя,
И воспомянух азъ щедроты твоя,
Яже ты явилъ намъ при Иордане,
            в Ермонстѣй стране,

При горѣ малѣ. А скорбь скорбь глашаетъ,
Что бездна бездну хлябий ся рѣшаетъ;
Волны божия по мнѣ преидоша,
            всего сотроша.

Но уже чаю день той приходити,
В онъ же ми хощетъ богъ милость явити;
Аз же и в нощи пѣснь воспою ему,
            богу моему.

Молюся богу живота моего,
Ты мой заступнике, – азъ реку до него, –
Почто мя забы? Дух мой унываетъ,
            врагъ ми стужаетъ.

Внегда ся кости моя сокрушаху,
Тогда ми врази мои поношаху:
“Гдѣ богъ твой? Рцы намъ выну стужающе,
            посмѣх дѣюще”.

Но ты, о душе, вскую скорбна еси?
Уповай в бозѣ, сущемъ на небеси.
Еще азъ ему имамъ воспѣвати,
            за бога знати.

ПСАЛОМЪ 45

Богъ намъ сила, прибѣжище,
    отъ волнъ скорбей пристанище.
Аще земля вся смутится,
    наше сердце не боится.
Аще горы преложатся,
    в сердце морско вовалятся,
Душа наша не смутится,
    в бозѣ силномъ утвердится.
Воды быша возмущенны,
    горы богомъ потрясенны,
Яже облакъ достизаху,
    неподвижны отъвѣк бяху.
Град господень вѣселится,
    егда рѣка близ точится,
И в немъ вышний освятилъ есть
    селение, в немъ же жилъ есть.
В средѣ града богъ витаетъ,
    тѣмъ недвижимъ той бываетъ,
Утро тщится в помощь ему,
    яко дому богъ своему.
Язык роди ся смятоша,
    и царствия упадоша.
Егда вышний гласъ свой даше,
    лютѣ земле трепѣташе.
Насъ господь силъ заступаете,
    Иаковля чада знаетъ.
Семо, роди, приидите,
    бога чюда дѣла зрите,
Яже в мирѣ сотворилъ есть,
    брань на земли утолилъ есть.
Лук сокрушитъ, меч сломити
    иматъ, огнемъ щитъ спалити.
Приидите, разсмотряйте,
    яко азъ бог, познавайте:
Во языцех вознесуся
    и на земли прославлюся.
Господи силъ съ нами буди,
    храни отъ бед своя люди.
Богъ Иаковль защититѣль
    наш в печалех утешитѣль.
        Слава.

ПСАЛОМЪ 60

Услыши, боже, моления моя,
Молитвы в уши да впустиши твоя;
Отъ конецъ земля азъ возопихъ к тебѣ,
Унывшу сердцу во тяжцей потребе.

Ты на камени мене вознеслъ еси
Отъ рва пропасти к свободы небеси.
Упование мое в тебѣ бяше,
Столпомъ крѣпости ты ся мнѣ творяше

Отъ лица врагов. Тѣмъ же азъ вселюся
В сѣнь твою вовѣк и возвеселюся;
В крове крилъ твоихъ ты мя защитиши,
Се бо молитвы ты моя слышиши.

Достояние изволилъ ты дати
Тщащимся тебе выну ся бояти;
День ко дни, боже, царю приложиши,
Лѣта в род и род его продолжиши,

Да пред тобою вовѣк пребываетъ
Милость и правду ти кто постизаетъ,
Тѣмъ тя во вѣки имамъ воспѣвати,
Молитвы моя в дѣнь всякъ воздаяти.

ПСАЛОМЪ 63

Услыши, боже, гласъ мой, егда ти молюся,
        тобою отъ вражия страха да измуся.
Отъ сонма лукавых мя изволи покрыти,
        от собора неправду смѣющихъ творити,
Иже язык свой яко мечь золъ изостриша,
        на лук свой на вещь горку стрѣлы наложиша.
Еже непорочнаго в тайнъ сострѣляти,
        состреляютъ и, ниже будутъ ся бояти.
Еже сѣть скрыти, – слово в себѣ утвердиша
        лукаво, – кто узритъ ю? – съ собою мыслиша.
Беззакония во мнѣ излиха искаша,
        но исканиемъ своимъ во исчезѣ сташа.
Приступилъ есть человѣк, се сердцѣ глубоко,
        богъ же разсыпав совѣтъ, взнесется высоко.
Стрелы младѣнецъ язвы люты онымъ быша,
        языцы ихъ во онех силы ся лишиша.
Всякъ, иже видѣ сия, смущенъ удивися
        и всяку человѣку страх в сердцѣ вселися.
Дѣла бога праваго миру возвѣстиша,
        его то творение быти разсудиша.
Правый же о господь муж возвѣселится
        и упованиемъ си во ономъ вселится.
Иже прави суть сердцемъ, будутъ ликовати,
        ибо господь изволитъ от бѣдъ я спасати.

ПСАЛОМЪ 73

Векую, боже, до конца насъ отрѣваеши,
        на овцы твоя ярость и гнѣвь являвши?
Помяни сонмъ людей ти исперва стяжаный,
        жезлъ достояния ти из всѣх род избраный.
Помяни Сионъ гору, юже ты избрати
        изволи, еже на ней в храмъ обитати.
Воздвигни руц твои на гордые люди,
        отмститель врагомъ твоимъ за ихъ злобы буди.
О, коль много зла в твоей святыни твориша!
        Ненавидящий тя в силъ ся хвалиша.
Посред праздника ти знамения своя
        возставляху на мѣста высокая твоя,
Яко победитѣли, а никако знаша,
        яко ты подалъ силу за грѣхи имъ наша.
Яко в дубравѣ, в градѣ сѣчь многу твориша,
        сечивы и оскорды дверь, стены ломиша.
Храмъ твой святый, ахъ, горе! огнемъ возжегоша,
        жилище ти осквернше, в пепелъ повергоша.
В сердцах своихъ мыслиша съ ужики своими:
        отставимъ вся праздники в Иерусалимѣ.
А мы знамений твоихъ ни мало видаеме,
        пророка не имамы, конца бѣдъ не знаемъ.
Мнимъ, яко не к тому насъ господь хощетъ знати,
        яко изволилъ в руки злых поганъ предати.
Но доколѣ, боже наш, врагъ ти поношаетъ,
        имя твое святое в конецъ раздражаетъ?
Векую десницу твою в нѣдрѣх содержиши-
        Время, да руку твою на враги пустиши.
Ты богъ и царь наш, древле явилъ спасени
        посредѣ земли, рѣшив людей пленѣние.
Ты силою твоею море утвердити
        моглъ еси и в немъ главы змиемъ сокрушити.
Тобою и глава ихъ тамо сокрушенна
        и в брашно чернымъ людемъ съ ними положенна.
Тобою из камене воды извѣдѣнны,
        а струи ифамския сухи сотворенны.
Твой есть день, твоя и нощь, ты совершилъ еси
        свѣтлу зарю и солнце в безмѣрномъ небѣси.
Тобою предѣлъ всякий земли утвердися
        и лѣто со вѣсною чрезъ тя сотворися.
Помяни, боже, яко врази ти стужиша
        нечестивии, имя твое раздражиша.
Не предаждь тымъ звѣремъ душ, тя бога знающим,
        не забуди в конецъ душъ, тя прославляющих.
Воспомяни завѣтъ твой, се бо исполнѣнии
    домов неправды, иже умомъ помрачении.
Да смирѣнный со срамомъ вспять не возвратится,
        да нищимъ и убогимъ имя ти славится.
Воскрѣсни, боже, и прю твою да судиши, хулы,
        яже ти вѣсь дѣнь, буимъ да отмстиши.
Гласъ рабов ти в памяти твоей да витаетъ,
        гордость нелюбящихъ тя в гору возрастаетъ.

ПСАЛОМЪ 81

Богъ ста во сонмѣ судей разсудити,
    како во людѣх тщатся суд творити.
Доколь ложный суд извѣщаете,
    лица муж грѣшных права являете.
Сира и вдову право разсуждайте,
    смиренна, нища в правду оправдайте.
Нища, убога отъ силных измите,
    из рук грѣшничихъ правых избавите.
Но они сего в разумъ не впустиша.
    лиц приятиемъ помрачени быша.
Основания земли ся смущаюте,
    вся развращенна во мирѣ бываютъ.
Азъ рехъ: вы есте бози в человѣцѣх,
    вышняго чяда в настоящихъ вѣцѣх.
Вы же, яко плоть, тли ся общаете
    и яко единъ отъ князь падаете.
Воскресни, боже, земли да судиши,
    яко в языцѣх всѣх ты наслѣдиши.

ПСАЛОМЪ 84

Возлюбилъ еси землю твою, боже,
Десница твоя пленѣннымъ поможе,
Еже из плена имъ ся возвратити,
            в отчествѣ жити.

Изволилъ еси людемъ ти простити
Беззакония и грѣхи покрыти,
Укротилъ ярость, отъ гнѣва вратился,
            щедр имъ явился.

Возврати, боже, сердца наша к тебѣ,
Утоли ярость, яже на ны, в себѣ,
Ярость, ея же не держиши в вѣки
            на человѣки.

Егда к намъ, боже, ты ся обратиши,
Благодатию вся ны оживиши,
Людие твои к тебѣ обратятся,
            возвѣселятся.

Изволи милость твою намъ явити
И спасение твое намъ дарствити;
Его же выну отъ тебѣ желаемъ
            и ожидаемъ.

Услышу аз, что богъ о мнѣ вѣщаетъ,
Мир людемъ своимъ дати обѣщаетъ,
И иже сердца к нему обращаютъ
            того да чаютъ.

Близ боящихся его спасение
И славы в земли нашей вселение,
Яко истинна и милость явися,
            в людѣх вселися.

Правда же съ миромъ взаимъ ся лобзаютъ,
Тѣма людие богу угождаютъ,
Истинна съ земли, егда возсияше,
            свыш правда зряше.

Господь дастъ благость, земля плоды родитъ,
Пред лицемъ его вездѣ правда ходитъ,
В путь стопы своя имать положити,
            при немъ ходити.

ПСАЛОМЪ 89

Господи, прибежище ты во скорбѣх наше
        былъ еси отъ рода в род, ты ны защищаше.
Прежде всѣх гор на земли, свѣтилъ на небѣси,
        прежде всѣх сущихъ вѣчно, боже наш, ты еси.
Человѣка во низость да не отвратиши
        ты и обращатися к благости учиши.
Тысяща лѣтъ у тебе яко день преходить
        вчерашний или стража нощная отходить.
Лѣта человѣческа якоже ничтоже
        воменяются тебѣ, о превѣчный боже!
Якоже трава утро красно прозябаетъ,
        таже цвѣтетъ, на вечер падши изсыхаетъ,
Тако вѣк наш гнѣвомъ бо твоимъ исчезаем,
    яростию твоею смущени бываемъ.
Беззакония наша пред лицемъ держиши,
        вѣк нашъ и деяния ты прѣсвѣтло зриши;
А дние наши скоро вси оскудѣваютъ,
        отъ ярости твоея съ словомъ исчезаютъ.
Якоже пучина вѣтромъ ся терзаетъ,
        тако удобно вѣк нашъ прѣсеченъ бываетъ,
Век днѣй человѣческихъ до лѣтъ сѣдмидесятъ,
        силенъ есть достизаяй до лѣтъ осмидесятъ.
Аще выше, то труд есть и болезнь велика,
        мех болезнѣй непщую того человѣка.
Яко кротость прииде на ны, накажемся,
        отъ лукавых налога дѣлесъ распряжемся.
Гнева твоего крѣпость кто можетъ познати
        и отъ страха ярость ти под число обяти?
Десницу твою тако изволь ми сказати
        и наказанно сердцѣ во мудрости дати.
Доколѣ, боже, годѣ? Уже обратися,
        рабомъ твоимъ смирѣннымъ умоленъ явися.
Утро милости твоя, боже, получихоме,
        вѣселия, радости исполнѣни быхом;
Вся дни вѣселихомся за дни смирѣния
        и за лѣта лютаго отъ врагъ плѣнения.
Призри на рабы твоя и на дѣла своя,
        и настави сыны их, буди милость твоя.
И буди свѣтлость на насъ господа нашего,
        яко мы уповаемъ на благодать его.
Дела рук нашихъ на нас, боже наш,
        исправи и все дѣло рук нашихъ утверди, управи.

ПСАЛОМЪ 100

Милость ти и суд, боже, прославляю,
        чистъ путь шествуя, пою, да познаю.
Когда ты ко мнѣ хощеши приити,
        тайны святые рабу ти явити.
Незлобно сердцѣ хранихъ в моемъ дому,
        не желах вещи отеяти никому.
Иже законъ твой дѣлы преступаху,
        во нѣнависти тии моей бяху.
Сердце лукаво мнѣ не прилепися,
        презрѣхъ, кто отъ насъ к злобе уклонися.
Иже ближнихъ си тай оклевѣташе,
        из моихъ лика изгонимь бываше.
Со гордымъ окомъ пищъ не причастихся,
        съ несытнымъ сердцемъ хлѣбомъ не сытихся.
Очеса моя верных муж искаху,
        мнѣ сицевии вездѣ присѣдаху.
И непорочнымъ кто путемъ хождаше,
        сей в двор моемъ рабъ мнѣ честенъ бяше.
Творяй гордыню, не жилъ в моемъ дому,
        лживому спѣти дах ни единому.
Грѣшныя тщахся скоро избивати
        из земля, дабы имъ не постояти,
Вси, иже законъ дѣлы прѣступаху,
        з града господня истреблени бяху.
            Слава.

ПСАЛОМЪ 102

Душе моя, господа да благословиши,
    утробо моя, имя его да славиши.
Благослови, о душе моя! пресвятаго,
    не забывай всѣх благихъ творений онаго,
Иже беззакония твоя очищаетъ
    и вся недуги твоя скоро исцѣляетъ.
Отъ истлѣния жизнь ти избавляющаго,
    милостию, щедроты тя вѣнчающаго;
Иже ти желание в благихъ исполняетъ,
    в юность тя, яко орла ветха, обновляетъ.
Творяй милостыню богъ и суд обидимымъ,
    отъ врагов нечестивых жестоко томимымъ,
Сказа пути Моисию си изволения,
    сыномъ израилевымъ своя хотѣния.
Щедр и милостив господь и долготерпящий,
    и кающимся милость многую творящий,
Не в конецъ гнѣвается, ни вѣчно враждуетъ,
    не по беззакониемъ нашымъ казнь дѣйствуетъ.
Ни по грѣхомъ нашымъ намъ изволилъ воздати,
    но елико отъ земля небу отстояти,
Утвердилъ есть милость си над страх имущими
    и прѣсвятое имя егово чтущими.
Елико отъ запада восток удаленны,
    толико злобы наша отъ насъ отринѣнны
Богомъ, иже якоже отецъ ущедряетъ
    сыны, боящимся и милость проявляетъ.
Ибо той создание наше совершенно
    позна, яко персть есмы, творение тлѣнно,
Человѣк яко трава, а вѣкъ исчезаетъ,
    якоже цвѣтъ на селѣ скоро отцвѣтаетъ,
Ибо духу изшедшу съ него не бываетъ,
    к тому мѣста своего в мирѣ не познаетъ.
Милость же господня есть отъ вѣка до вѣка
    на право боящася его человѣка,
Правда его на чадѣх чяд имать пребыти,
    хранящихъ завѣтъ тщивых заповѣдь творити.
Господь в небѣси прѣстолъ себѣ утвердилъ есть
    и вся царствия власти своей подчинилъ есть.
Вси аггели силнии, ублагословит
    бога, иже в крѣпости гласъ его творите.
Благословите бога и вся силы его,
    слузи, творящии гласъ господа своего.
Благословите бога, вся его дѣлеса,
    вся, яже мир содержитъ и яже небѣса.
На всяцемъ мѣстѣ, имъ же господь обладаетъ,
    душа моя господа да благословляетъ.


Источники:

 

Запись опубликована в рубрике Псалтырь с метками . Добавьте в закладки постоянную ссылку.

Добавить комментарий