Свт. Димитрий Ростовский. Псалмы или духовные канты

1 502

Димитрий святитель Ростовский. Псалмы или духовные канты [Электронный ресурс] / Свт. Димитрий Ростовский // Библейско-богословская коллекция. – Серия “Святоотеческие творения”. – Санкт-Петербург: Аксион эстин 2009. – 1 электрон. опт. диск (CD-ROM).

ПСАЛОМЪ 1[1]

Іисусе мой прелюбезный,
сердцу сладосте,
Едина въ скорбехъ утѣха,
моя радосте.

Рцы души моей,
твое есмь Азъ спасеніе,
Очищеніе грѣховъ и
въ рай вселеніе.

Мнѣ же Тебѣ Богу благо
прилѣплятися.
Отъ Тебе милосердія
надѣятися.

Никто же мнѣ въ моихъ бѣдахъ
грѣшному поможетъ,
Аще не Ты, о всеблагій
Іисусе Боже!

Хотѣніе мнѣ едино
съ Тобою быти:
Даждь ми Тебе Христа въ сердцѣ
всегда имѣти.

Изволь во мнѣ обитати,
благъ мнѣ являйся,
Мною грѣшнымъ недостойнымъ
не возгнушайся.

Изчезе въ болѣзни животъ
безъ Тебе Бога:
Ты мнѣ крѣпость и здравіе,
Ты слава многа.

Радуюся азъ о Тебѣ
и веселюся,
И Тобою во вся вѣки,
Боже, хвалюся.

ПСАЛОМЪ 2

Надежду мою
Въ Бозѣ полагаю,
Промыслу Его
Весь себе отдаю.

Яко Онъ хощетъ
Такъ о мнѣ устроитъ,
А Его воли
Никто не престроитъ.

Cудьбы Господни
Есть то бездна многа,
Въ тайныхъ совѣтѣхъ
Кто постигнетъ Бога?

Аще что кому
Онъ воохощетъ дати,
Людская зависть
Не можетъ препяти.

Кому у Него
Что предоставлено,
То непремѣнно
Будетъ исполнено.

Убо надежда
Моя буди къ Богу,—
Удивитъ на мнѣ
Милость свою многу.

Не надѣюся
На князи и люди,
Въ тѣхъ уповая
Постыженъ есть всюду.

Часть моя еси
Ты единый Боже,
Твоя десница
Во всемъ мнѣ поможетъ.

Десница Твоя
Та сотворитъ силу,
Исдѣлитъ душу,
Дастъ здравіе тѣлу.

Та и вся блага,
Аще ихъ есть требѣ[2],
Вскорѣ дать можетъ
И потомъ жить въ небѣ.

ПСАЛОМЪ 3

Ты мой Богъ, Іисусе,
Ты моя радосте;
Ты ми веселіе,
Ты моя сладосте!

Аще бы вся моя
Погубилъ во мірѣ,
Тя паче, Боже мой,
Всегда имамъ въ вѣрѣ.

Богатства земная
Ни во что вмѣняю,
Егда зря на небо
Тя Бога всѣхъ знаю.

Аще мя скорбиши,
Долженъ есмь хранити[3],
Аще мя біеши,
Буду тя хвалити.

Люблю тя, Боже мой,
Надъ всѣхъ святѣйшаго;
Хвалю Тя, Царю мой,
Всѣхъ достойнѣйшаго.

Дверь сердца моего
Сокруши каменну,
Положи въ насъ любовь
Къ Тебѣ пламенну.

Аще бы людіе
Тя, Христе, познали,
Никогда бы Тебе
Грѣхми прогнѣвляли.

Аще Тя познаемъ
Въ мольбѣ херувимской,
Тогда Тя прославимъ
Въ хвалѣ серафимской.

Хощемъ всеусердно Тя,
Христе, познати;
Ты насъ лицемъ къ лицу
Сподоби взирати.

ПСАДОМЪ 4[4]

Похвалу принесу
Сладкому Іисусу:
Бо Той моя слава
И всѣмъ есть похвала.
Іисусе прекрасный!

Въ Троицѣ славимый,
Всѣмъ непостижимый,
Архангеловъ творче,
Отъ бѣсовъ поборче.
Іисусе прекрасный!

Монахомъ радосте,
Іереомъ сладосте,
Дай же и мнѣ радость,
Спасенія сладость.
Іисусе прекрасный!

Не отрини мене,
Святе, взыщи мене,
Въ грѣхахъ лежащаго,
Не востающаго.
Іисусе прекрасный!

Вышнихъ создателю,
Земныхъ искупителю,
Не забуди мене,
Не погуби мене.
Іисусе прекрасный!

О! Царю преславный,
Агнче непорочный,
Надеждо во смерти,
Животъ всѣмъ по смерти.
Іисусе прекрасный!

Одеждо краснаго,
Отца небеснаго,
Одѣй мя тоею
Ласкою твоею.
Іисусе прекрасный!

Скорбящимъ радосте
И жезле старости;
Дай же мнѣ утѣху
Въ подвизехъ успѣху.
Іисусе прекрасный!

Не остави мене
Творче, взыщи мене
Пастырю всещедрый
И премилосердый.
Іисусе прекрасный!

Не по дѣломъ моимъ,
По щедротамъ твоимъ
Суди мене Пане[5],
Вышнихъ силъ Гетмане[6].
Iисусе прекрасный!

Прійми се малое
Моленіе мое,
И скоро потщися,
На мя умилися.
Іисусе прекрасный!

Останную мольб
Къ тебѣ приношаю
И смиреннымъ сердцемъ
До Тебе взываю:
Іисусе прекрасный!

ПСАЛОМЪ 5

Христе мой Боже,
Іисусе сладчайшій,
Спасителю мой
Зѣло величайшій!

Подаждь ми присно
Въ воли твоей жити
И страсги твоя
Въ сердцы ми носити.

Да образъ твой зря,
Свята Бога знаю,
И въ руцѣ твои
Духъ мой предаваю.

Яко хощеши,
Твори, Боже, мною,
Да не скрыетъ тма
Грѣховная мглою.

Господи Боже!
Дѣла твоя дивна;
Прими рабъ твоихъ
Словеса умильна,

Йже молитвы
Тебѣ приношаютъ;
А матерь твою
Пѣснми почитаютъ.

ПСАЛОМЪ 6

Превзыдохъ мѣру,
О мой вѣчный Боже,
Во дневныхъ злобахъ;
Кто ми въ томъ поможетъ?

Преступихъ законъ,
О! мой крѣпкій Боже,
И кто мнѣ нынѣ
Грѣшному поможетъ?

Развѣ Ты, Отче,
Высокій въ милости,
Подаси руку
Мнѣ въ моей бѣдности.

Яко вся моя
Лѣта иждихъ блуднѣ,
Въ мірскихъ суетахъ
Грѣшный пребыхъ гнуснѣ.

Воспрійму на ся
Зракъ сына блуднаго,
Пойду умолю
Отца небеснаго:

Согрѣшихъ, Отче,
И моя есть вина,
Нѣсмь достоинъ быть
У Тебе за сына.

Согрѣшихъ къ Тебѣ,
Отче милосердый;
Будь мнѣ милостивъ,
Молю азъ, злосердый.

А грѣхи, ихъ же
Творихъ отъ юности,
Остави, прости
По твоей благости.

И научи мя
Безпорочно жити,
Впредь сохрани мя
Отъ грѣховной сѣти.

Днесъ же да буду
Твоимъ наемникомъ,
Вѣрнымъ Ти рабомъ,
Вѣрнымъ послушникомъ.

Даждь ми по твоей
Воли всегда жити,
По здѣшней жизни
Небо улучити.

ПСАЛОМЪ 7

Воплю къ Богу въ бѣдѣ моей, —
Да мя Онъ услышитъ,
И въ велицѣй скорби моей
Весело утѣшитъ.

Обратитъ мой плачь въ веселіе
И въ радость преложитъ,
Тяжкое ми злолучество
Во благо приводитъ.

Не вѣмъ откуду вѣтръ возвѣетъ
Въ сладостной охладѣ,
Уже падаю отвсюду
Сущи на свободѣ.

Надежда мя утверждаетъ,
Мысль ми направляетъ,
Указуетъ тещи къ Богу,
Кій все устрояетъ.

Аще бы подъ землю скрылся
И тамъ мя обрящетъ,
Аще въ камень заключился
И тамъ мя досяжетъ.

Но азъ стоя издалеча
Прикладомъ[7] грѣшнаго,
Реку: о! Боже, почто мя
Оставилъ страстнаго.

Приспѣ время исправленья
Живота моего,
Изъ младыхъ бо лѣтъ въ жизни сей
Дѣяхъ много злаго.

Помилуй мя Ты грѣшнаго,
О, мой вѣчный Боже!
И въ уши святыя твоя
Прійми вопль мой уже.

И подаждь ми терпѣніе
Всѣхъ страданій моихъ,
Управи мя, яко жъ вѣси,
Духомъ святымъ твоимъ.

Аще волишь наказати,
Буди воля твоя,
Токмо да спасется душа
Милостивно моя.

Весь день, всю нощъ восклицаю,
Господи мой, къ тебѣ:
Услыши молитву мою
И прійми ю къ себѣ.

Подаждь же мнѣ милость твою,
Избави отъ муки,
Понеже азъ вельми впадохъ
Чрезъ грѣхъ въ твои руки.

ПСАЛОМЪ 8

Мати милосерда!
Ты еси ограда,
Отъ лютаго врага злаго
Храниши мя всегда.

Онъ лютый рыкаетъ,
Бѣдна мя хищаетъ;
Скоро, скоро твоя помощь
Отъ того избавляетъ.

На всякій часъ зову,
Въ немощи воззову,
Воплемъ крѣпкимъ Мати Тебе,
Чиста Дѣво, молю.

Не вѣмъ азъ кончину,
Дне того годину,
Къ Тебѣ, къ Тебѣ, всѣхъ Царице,
Очи мои выну.

Прошу Тя всещедру,
Матерь милосерду,
Гласъ услыши мой, плачь внуши,
Молю Тя всещедру.

Руцѣ да воздѣну
Ко твоему Сыну,
Мати, Мати преблагая
Ходатайствуй къ Нему.

Тебе, Дѣво, молю,
Воплемъ крѣпкимъ зову,
Душу, сердце, въ воздыханій —
Преклоняя главу.

ПСАЛОМЪ ВЪ ЧЕСТЬ СВ. ДИМИТРІЯ

Торжествуй днесь Россійска страна,
Благодать намъ отъ небесъ дана,
Веселися днесь граде Ростовъ,
Се Димитрій Святитель Христовъ,
Пастырь стада освященный
Отъ земныхъ нѣдръ намъ нынѣ явленный.

Благотворны всѣмъ ліетъ струи,
Съ вѣрой спѣшно всякъ къ нему теки,
Примешь помощь, здравіе, цѣльбу,
Пролей токмо усердну мольбу;
Его гласу Богъ внушаетъ
Еже проситъ, то все исполняетъ.

Добродѣтель и вѣра его
Вознесеся передъ Вышняго,
Не укрылся градъ верху горы,
Но всѣмъ явно Богъ его откры,
Вѣрныхъ въ вѣрѣ укрѣпляя,
А противныхъ въ конецъ посрамляя.

Красуйся вся паства его зря,
Таковаго Архипастыря,
Посрамися противниче всякъ,
Виждь, отрясши очесъ твоихъ мракъ,
Правой вѣры се учитель,
Заблужденія жъ искоренитель.

Ликуй убо православіе,
Прославляяй Творца за сіе.
Боже! призри, виждь твой виноградъ,
Не дай терну въ ономъ возрастать.
Вертоградарей и нынѣ
Таковыхъ же даждь твоей святынѣ.

Ты же, нынѣ нетлѣннымъ вѣнцемъ
Увѣнчанный, стоя предъ Творцемъ,
Неотсутствуй и духомъ отъ насъ,
Но присутствуй и внушай нашъ гласъ;
Отъ навѣта насъ избави,
Во благое всякъ путь нашъ направи.

[1] Изъ начальныхъ буквъ стиховъ этого псалма составляется акростихъ: „Іеромонах Димитри”.
[2] Потребно.
[3] Терпѣти.
[4] Этотъ псаломъ заимствованъ изъ акаѳиста Іисусу и написанъ по подобію его. П. А. И.
[5] Господи.
[6] Воеводо.
[7] По примѣру.